ध्वजारोहणानंतर पळसपुर जिल्हा परिषद शाळेत विद्यार्थ्यांना ट्रॉफी व रोख पारितोषिकाचे वितरण

हिमायतनगर / विष्णु जाधव

तालुक्यातील पळसपुर येथील जिल्हा परिषद प्राथमिक शाळेत स्वातंत्र्यदिन उत्साहात साजरा करण्यात आला. ध्वजारोहणानंतर विद्यार्थ्यांसाठी आयोजित करण्यात आलेल्या सामान्य ज्ञान स्पर्धेतील गुणवंत विद्यार्थ्यांचा ट्रॉफी व रोख पारितोषिक देऊन गौरव करण्यात आला.

विमा प्रतिनिधी दिनेश वानखेडे यांच्या वतीने विद्यार्थ्यांना ट्रॉफीचे वाटप करण्यात आले. तसेच उत्कृष्ट कामगिरी करणाऱ्या विद्यार्थ्यांना ट्रॉफीसोबत रोख रक्कमही देण्यात आली. विद्यार्थ्यांच्या गुणवत्तेला प्रोत्साहन देणाऱ्या या उपक्रमामुळे विद्यार्थ्यांमध्ये उत्साहाचे वातावरण निर्माण झाले. पळसपुर जिल्हा परिषद शाळा ही विद्यार्थ्यांच्या शैक्षणिक प्रगतीसोबतच त्यांच्या कला, क्रीडा, वक्तृत्व, सामान्य ज्ञान आणि विविध कलागुणांना वाव देण्यासाठी सातत्याने प्रयत्नशील असते. विद्यार्थ्यांना विविध स्पर्धांमध्ये सहभागी होण्यासाठी प्रोत्साहन देऊन त्यांच्या सुप्त गुणांना योग्य व्यासपीठ उपलब्ध करून देण्याचे काम शाळेच्या माध्यमातून केले जात आहे.

या निमित्ताने आयोजित सामान्य ज्ञान स्पर्धेसाठी हिमायतनगर येथील प्रगती कोचिंग क्लासेसने प्रश्नपत्रिका तयार करून दिली. त्याबद्दल शाळेच्या वतीने प्रगती कोचिंग क्लासेसचे आभार मानण्यात आले. स्पर्धेच्या माध्यमातून विद्यार्थ्यांच्या सामान्य ज्ञानात वाढ होण्यासोबतच त्यांच्यात स्पर्धात्मक वृत्ती निर्माण होण्यास मदत झाली. ही स्पर्धा यशस्वीपणे पार पाडण्यासाठी मुख्याध्यापकांसह सर्व सहशिक्षक, शालेय व्यवस्थापन समितीचे पदाधिकारी, निवृत्ती वानखेडे, दिनेश वानखेडे आणि दिगंबर वानखेडे यांनी विशेष परिश्रम घेतले.

कार्यक्रमाला मुख्याध्यापक, शाळेतील सर्व सहशिक्षक, शालेय व्यवस्थापन समितीचे पदाधिकारी, ग्रामपंचायतीचे सरपंच, उपसरपंच, सर्व सदस्य, कृषि सहाय्यक, कृषि मित्र तसेच ग्रामस्थ मोठ्या संख्येने उपस्थित होते. उपस्थित मान्यवरांच्या हस्ते विद्यार्थ्यांचा सत्कार करण्यात आला. स्वातंत्र्यदिनाच्या पार्श्वभूमीवर ध्वजारोहणानंतर पारितोषिक वितरणाचा कार्यक्रम घेण्यात आल्याने शाळेच्या परिसरात उत्साहाचे वातावरण निर्माण झाले होते. विद्यार्थ्यांना प्रोत्साहन देण्यासाठी ग्रामस्थ व पालकांनीही या उपक्रमाचे कौतुक केले.  ग्रामीण भागातील विद्यार्थ्यांच्या गुणवत्तेला प्रोत्साहन देत त्यांच्या कलागुणांना वाव देणारे उपक्रम सातत्याने राबविणे हीच विद्यार्थ्यांच्या उज्ज्वल भविष्यासाठीची खरी गुंतवणूक आहे, अशी भावना यावेळी उपस्थितांनी व्यक्त केली.