जिल्हा परिषद वरिष्ठ प्राथमिक शाळा, पवना येथे विद्यार्थ्यांच्या आरोग्याशी खेळ का ?

हिमायतनगर / दाऊ गाडगेवाड

विद्यार्थ्यांना शिक्षणासोबत स्वच्छ, सुरक्षित आणि आरोग्यदायी वातावरण मिळावे, ही शासनाची भूमिका आहे. मात्र, हिमायतनगर तालुक्यातील जिल्हा परिषद वरिष्ठ प्राथमिक शाळा, पवना येथील स्वच्छतागृहांची दयनीय अवस्था या उद्देशालाच हरताळ फासणारी असल्याची तक्रार पालक व ग्रामस्थांकडून करण्यात येत आहे.

शाळेतील संडास-बाथरूममध्ये घाण, दुर्गंधी आणि अस्वच्छता असल्याने विद्यार्थ्यांना मोठ्या गैरसोयीचा सामना करावा लागत असल्याचे सांगण्यात येते. दिवसातील अनेक तास शाळेत घालवणाऱ्या विद्यार्थ्यांसाठी स्वच्छतागृह ही अत्यावश्यक सुविधा आहे. मात्र, हीच सुविधा अस्वच्छ आणि दुरवस्थेत असेल, तर विद्यार्थ्यांच्या आरोग्याची जबाबदारी नेमकी कोणाची? असा संतप्त सवाल पालकांकडून उपस्थित केला जात आहे.

अस्वच्छ स्वच्छतागृहांमुळे विद्यार्थ्यांना ती वापरण्यास अडचण निर्माण होत असल्याची तक्रार आहे. घाण, दुर्गंधी आणि स्वच्छतेचा अभाव यामुळे विद्यार्थ्यांच्या आरोग्यावर विपरीत परिणाम होण्याची शक्यता पालकांनी व्यक्त केली आहे. एखादी गंभीर आरोग्यविषयक समस्या निर्माण झाल्यानंतर प्रशासन जागे होणार का, असा सवालही ग्रामस्थांकडून केला जात आहे.

एकीकडे शासनाकडून शाळांमध्ये स्वच्छता, आरोग्य आणि विद्यार्थ्यांना सुरक्षित वातावरण उपलब्ध करून देण्यासाठी विविध उपक्रम राबविले जातात. मात्र, प्रत्यक्ष शाळेतील मूलभूत स्वच्छतागृहांची अशी अवस्था असेल तर संबंधित अभियानांच्या अंमलबजावणीवर प्रश्नचिन्ह निर्माण होत असल्याचे पालकांचे म्हणणे आहे.

शाळा ही विद्यार्थ्यांचे भविष्य घडविण्याची जागा आहे. त्यामुळे शाळेच्या परिसरात स्वच्छता, पिण्याचे पाणी आणि वापरण्यायोग्य स्वच्छतागृह यांसारख्या मूलभूत सुविधा उपलब्ध असणे गरजेचे आहे.

शाळेतील स्वच्छतागृहांची तातडीने प्रत्यक्ष पाहणी करून युद्धपातळीवर स्वच्छता करण्यात यावी, अशी मागणी पालक व ग्रामस्थांनी होत आहे. तसेच आवश्यक दुरुस्ती, पाणीपुरवठा आणि इतर मूलभूत सुविधा उपलब्ध करून द्याव्यात, अशीही मागणी करण्यात येत आहे.

स्वच्छतागृहांची नियमित स्वच्छता आणि देखभाल होत आहे की नाही, याची संबंधित अधिकाऱ्यांनी वेळोवेळी तपासणी करावी. समस्या निर्माण झाल्यानंतर केवळ आश्वासने न देता प्रत्यक्ष उपाययोजना करण्याची गरज असल्याचे पालकांचे म्हणणे आहे.

विद्यार्थ्यांच्या आरोग्याशी संबंधित हा अत्यंत संवेदनशील प्रश्न असल्याने जिल्हा परिषद नांदेड, शिक्षण विभाग तसेच संबंधित अधिकाऱ्यांनी पवना येथील शाळेची तातडीने पाहणी करून वस्तुस्थिती तपासावी, अशी मागणी पालक व ग्रामस्थांकडून होत आहे.

“उद्या एखादा विद्यार्थी आजारी पडल्यानंतर प्रशासन जागे होणार आहे का ? विद्यार्थ्यांचे शिक्षण महत्त्वाचे आहेच; मात्र त्याहून महत्त्वाचे त्यांचे आरोग्य आहे. विद्यार्थ्यांच्या आरोग्याशी कोणतीही तडजोड होऊ नये,” अशी भावना पालक व ग्रामस्थांनी व्यक्त केली आहे.

आता प्रशासन या तक्रारीची कितपत दखल घेते आणि शाळेतील स्वच्छतागृहांची प्रत्यक्ष पाहणी करून तातडीने काय उपाययोजना करते, याकडे पालक व ग्रामस्थांचे लक्ष लागले आहे.