नासाच्या आर्टेमिस-२ मोहिमेत पळसपूर शाळेच्या विद्यार्थ्यांची नावे चंद्रावर
हिमायतनगर / विष्णु जाधव
हिमायतनगर तालुक्यातील जिल्हा परिषद प्राथमिक शाळा पळसपुर येथील विद्यार्थ्यांसाठी अभिमानाची बातमी समोर आली आहे. नासा यांच्या महत्त्वाकांक्षी आर्टेमिस-२ चंद्र मोहिमेत या शाळेतील विद्यार्थ्यांची नावे थेट चंद्रावर पाठवली जाणार आहेत.
नासाने या मोहिमेसाठी जगभरातील विद्यार्थी, शाळा, संस्था आणि कंपन्यांकडून नावे मागवली होती. त्यानुसार पळसपूर येथील विद्यार्थ्यांची नावे एका विशेष सूक्ष्म चिपमध्ये (मायक्रोचिप) साठवली जाणार असून ही चिप आर्टेमिस-२ मोहिमेसोबत चंद्राच्या दिशेने पाठवली जाणार आहे.
ही मोहीम सुमारे १० दिवसांची असणार असून यात चार अंतराळवीर सहभागी होणार आहेत. हे अंतराळवीर चंद्राभोवती भ्रमण करून पुन्हा पृथ्वीवर परत येणार आहेत.
या उपक्रमामुळे ग्रामीण भागातील विद्यार्थ्यांनाही जागतिक स्तरावर ओळख मिळत असून शाळा व परिसरात आनंदाचे वातावरण आहे. तसेच विद्यार्थ्यांसाठी हा एक प्रेरणादायी आणि अभिमानाचा क्षण मानला जात आहे.
